حوار الزواج ..
حوار خفيف بين الأم وابنها
الأم باللون الأزرق
امتى بتتزوج ياوليدي ؟ شن ما زال تراجي ؟ شن بتقعد لين يفوت فيك الفايت ؟
غير شن هالكلام يمّه ؟ اني قاعد ما صكرتش الثلاثين !
وشنو ثلاثين شوية ! زمان بوك في عمرك توا ، عنده انت واختك وخوك .
يمة كل وقت ووقته ، هذاك وقت وهذا وقت .
لا يوليدي الوقت هو هو ، الناس هي اللي تغيرت وتشريطها كثُر ، نبّي حوش ، نبّي سيارة ، نبي أثاث ، نبي نبي نبي ، واخر حاجة تقولك مانبّيش ، تفرح انت اللي قالت مانبيش ، تحسابها ماتبيش الذهب ، تطلع ما تبيش امك .
والله يمه هي مش ملزومة بيك ، انت أمي اني ، مش امها هيَّ ، اني اللّي ملزم بيك .
باهي باهي ، توا قوللي : غير تعالى قعمز بحداي .
اهو قعمزنا .
قوللي :
انعم .
شن رايك في بنت عمك عمر ؟ والّا بنت عمك السايح ؟ وحتى خالك خليفة عنده بنية زي الذهبة ، والّا حاط عينك على وحدة ثانية ؟
والله شن بنقولك يمّه ؟
لا تقوللي لا نقولك ، باعد علينا جيهة الظهرة ، وجيهة الوادي ، وجيهة الكاف ، والجيهة الغربية ، والجيهات اللي وراها ، وراك تقرب يا ولدي جيهة السوق ، راهم واعرين وبناويتهم في الاول باهيين باهيين ، وبعدين وين يتمكنو ، ما تطلب الروف إلا من ربي .
قوللي :
خيرها بنية عمك السايح يا وليدي ؟ شن ناقصها ؟ زين وسماحة وقد ، وفوق هذا كله ، لينا ونعرفوها ذات وصيفات ، وامّاليها ناس طيبة ، وخوها مراد صاحبك وقريت انت وياه وتعرفه ، واللي تعرفه خير من اللي ماتعرفاش ياوليدي ، هيا قول شن رايك ؟ .
شن رايي فاش يمّه ؟
فاش ؟
ليا ساعتين واني نهدرز ، وتوا تقوللي فاش ! وين كنت سارح ؟ .
والله يمه الحق ماكنتش سارح ، لكن انت خليتيلي فرصة باش نختار ؟ في الاول تقوليلي دور، وبعدين جبتيلي بناويت عمامي وخوالي ، وبعدين سكرتي عليّا الطريق ، عشر جيهات ماتبينيش نقربهم ، وفي الاخير دُرتي دُرتي ولّيتي لعمي السايح ، يمه بنت عمي السايح أكبر مني بخمس سنين !!.
وكان هذا يا وليدي ، هاذي راكزة وعاقلة ، مش زي هالطايشات ، اللي لا يقدّروا شيباني ولا عزوز ، وبعدين هاذي ما تكلفنا شيء يا ولدي .
غير شن هالكلام يمة ، ماتكلفنا شيء ؟ اني بنتزوج وإلا بنشري دولاب ؟ .
وشن الفرق ياولدي كله بالفلوس .
يمّه هذا زواج مش لعب ، لازم اني نكون مقتنع بيها ، ولازم هي تكون مقتنعة بيّ يعني لازم نكونو متفاهمين .
كلامك باهي ياوليدي وزي العسل ، حتى احني متفاهمين .
كيف ؟ منو احني اللي متفاهمين ؟
احني احني ، اني وبوك وعمك السايح والبنية وامها .
واني وين من هذا كلّه ؟ منو خذي رايي ؟ منو شاورني ؟ عطيتوني من غير ما تاخذو.... لخبطّيني يمِّي .. قصدي خذيتولي من غير ماتاخذو رايي !!.
كيف يا وليدي أمّاله اني شن اندير، أهو من الصبح واني ناخذ في رايك .
لا واضح تاخذي في رايي هلبة .
شن ياوليدي انت عندك راي ثاني ؟
طبعا عندي راي ثاني وثالث ورابع . اني يمة بالعربي ، نبّي وحدة ثانية
وحدة ثانية ؟!
انعم وحدة ثانية ، ومن جيهة السوق
كيييييف ؟ ... من جهة السوق ؟! وكيف انديرو مع عمك السايح ، اللي تمّينا معاه ؟
تمّيتو معاااااه ؟!!
انعم تمّينا معاه ، ورفعنا حتى البيان ، واعطيناه حتى الشرط .
واني وين يمه ؟
انت لاهي بينا ؟..... انت لاهي تدور وتسكرف في السوق .
اسمعي يمه لا تضربي المعاني ولا تقوليلي سوق ، وخيره السوق شن ناقصه ؟ اني البنية اللي قلتلك عليها نبيها وتبيني ، وانتم تفاهمو مع السايح ، اني ما خذي رايي حد ، ما نعرف حد .
ياحشمتنا يا حشمتنا مع الراجل ، شن بنقولوله ؟ بعد ما وتُّو كل شيء ، والبنية شرت اللي ناقصها ، مسيكينة شن بيصير فيها ؟
والله تحملو ، انتو اللي درتو هالخبر من غير ماتشاوروني ، تحمّلو اللي يجيكم
ياحليلي ويا حشمتي ، كيف بندير مع البنية وامها ؟
والله كانك متحشمة معاهم اني عندي حل !
قول ياوليدي ان شاءالله ربي يهديك ، اني عارفاتك عاقل ، وماتطلعش على طوع ولديك ، قول قول :.
شن رايك باش ماتقعديش في الحشايم !
ايه إيه ياولدي .
شن رايك تاخذيها لبووووي .
نوض نوض من مكانك ، إشي هالراي ... حتى اني ما لقيت ما ندير ، باهي اللي الحاج مش قاعد ، وكان هذا راهي جت على باله كلمة ولده .
السلام عليكم ، شن حسّه الولد يقول يا مرا.
من كتاباتي : رضا صميده
من طرف احمد صالح 22.07.20 13:29
