بوبكر بو زقية ..

موضوع: بوبكر بو زقية .. 18.12.13 10:14

العيلتين صايرة فيهم حالة ، عيلة بو كبوس وعيلة بو بلغة ، قالوا واحد من عيلة بو بلغة شوره متسلف فلوس من واحد من عيلة بو كبوس ، جاهم طير شر قاللهم صاحبكم اللي متسلف منكم الفلوس وليه عام ما خلصكمش أوينه يساوم في راس بميه وثلاثين ألف ، الجماعة على سبلة واليبرة خذت مفعولها في ثواني : قالو مادام عنده فلوس يخلصنا قبل في فلوسنا اللي متسلفها مننا ، وبعدين يتفشخر كيف ما يبي ، المهم ركبت بعضها هو مسكر راصه ، ما يبيش يخلص وهما مصكرين روصهم ، لزما وحتما يخلصهم توا ، قول ركبت بعضها وطلعوا على بعضهم السلاح ، وبدي فيها الرمي فوق الكبابيس وتحت البلغ ، وهادوك الصغار يتعايطوا والنساوين يتنادبوا والشيابين يلجوا ما عارفين كيف يديروا مع هالشبيبة اللي ما يعرفوش كان السلاح، المشكلة العيلتين يسكنوا في شارع واحد ، حوش بحوش ، وعلنوا حالة الطواريء في هاضاك الشارع اربعة أيام ، الحمد لله ما صارش سو ، لكن ما فيش من تحرك وحز الموضوع ، متاعين الشارع لاتعرفهم خايفين من التدخل ولا تعرفهم متشمتين ، خامس يوم الشارع مصكر واللي يبان راصه من الباب يحصل كشة برصاصة ، على جيّة السي بوبكر بو زقية ، كان مهناش المدة اللي فاتت وما يندري على شيء، مروح لحوشه ، وصل وسط هاضاك الشارع وبدي الرصاص يكتح تحت رجليه وفوق راصه ، وهو ينقز على رجل مسكين وين قريب يوصل لباب حوشه ، يرده الرصاص لوسط الشارع ، تقول فيلم بنديتي ، هو في الحقيقة ما عرفوشي في الاول ، لكن بعدين زبطوه صيح واحد منهم : بطل الرصاص انت واياه هذا عمكم بوبكر بو زقية خلوه يخش لحوشة ، المهم أخيرا وصل لحوشه ، قاللهم : شن فيه خيره الصاكر مشرّع ؟ حكوله القصة . قال : معقولة ؟ مافيش واحد راسه في دماغه ، قول دار كتيتينة بيضه وربطها في عصاة مكنسة ، وطلع راصه من الباب ، طلع رجله من الباب ، وقف في وسط الشارع ، مافيش رصاص ، تشجع وقال باعلى صوته : الليلة عيلة البراطيل والكنادر ، عنادهم عنشي .
إيه أني ما قلتلكمش على عمكم الحاج بوبكر بوزقية ، هذا ياسيدي باختصار كان مسافر .. وماتنشدوش وين ؟ . هو من كلمته (عنادهم عنشي ) المفروض تعرفوا ، هو قصده يقول (عشاهم عندي ) .. مسكين ديمة يلخبط في الدوة لكن تصلح هلبة ، كان ما تفهمش منه كلمة ، توا باهي اتصلح قاعد شوية كليمات يتلخبط فيهم ، مشكلته حشيشته يتكلم بالامثال ، المهم الجماعة من العيلتين تلاقوا في الصالة يراجوا في الحاج بو زقية شن يبي ؟ وكيف يقدر يصلح بين العيلتين ؟ دورة خش عليهم ،
العلام سليكم
مفهومة !! هما عارفينة شن يقول مش زيكم ،، ردوا عليه ...
وعليكم السلام
توا مافيكمش واحد عاقل يعرك هالحزة ؟
الله غالب ياحاج كل واحد خايف يتدخل ..
باهي وانتم خيركم ماتحطوش روصكم في عقولكم ؟
هم اللي بدوا ياحاج .. هم اللي طلعوا السلاح .. عيلة بو بلغة ..
حق انتم اللي سلحتوا الطلاع ؟
نعم احني طلعنا السلاح ، جو هاجمين علينا ياحاج شن تبينا انديروا ؟ نوقفولهم لين يكملونا ؟
لكن هما على سمع المحسوب جوكم بفسي العصيان مش بالطيط ما ..
من قالك يا حاج ؟ راهم يتبلـّوا علينا شن الميم طاء اللي طلعناها ؟
من قاللي ؟ أني رحت بشوفي ، وودنت بسماعي ..
لا ياحاج انت غالط هادي أغراض عامة مش ميم طاء ..
آه .. والاعمام غارضة هادي ماتقتلش ؟ اسمعو يا مصايب اللي صار صار ، والحمد لله المرة هادي ست جليمة
، والراجل اقرشوه اعطيطاته ، وياشار مادخلك در ، وحبال بير طاحوا في سو ، ودير الناسية وابهاها
، ودير الفاكرة واتعفنها ، وكل عيلة تفرخ بالها من ردودها ، ويقولوا من زمان : يديرها الابتر يحصل
فيها فتيل الطوّالة . توا نوضوا اسمحوا الطلاب من بعضكم ، وخلوا هالنهار يخري على ميش ،
والله مادخّلني قرقارش كان المهبّلة اللي زيكم .
مع تحياتي : رضا صميده

موضوع: رد: بوبكر بو زقية .. 25.12.13 16:27

يا ودي ابدعت يا شيخ رضا فلقتنا بالضحك يعطيك السلامة

موضوع: رد: بوبكر بو زقية .. 09.01.14 22:12

ليش طلع من قرقرش بس
حلوة حلوة حلوة الحكية

موضوع: رد: بوبكر بو زقية .. 09.01.14 22:34

تعرف يا سيد رضا فكرتني بشيباني توا متوفي رحمه الله , كل ما يحكي يغلط ويجيب الكلام بالمقلوب .......... ومنها مرة يهدرز في زحمة في مربوعة شوي قال : منين خالي الفاس طبس على مصباح وضربه بيه لين جبهته خشت !!!!!

برا راك مبدع في القص وربي يطيحك في مربوعة كلها شيابين متاع زمان زي هذاك اللي قال : أنا نقول ليه زمان ما عادش يبان هههههههه

مودتي

موضوع: رد: بوبكر بو زقية .. 10.01.14 1:09

النايل كتب:: يا ودي ابدعت يا شيخ رضا فلقتنا بالضحك يعطيك السلامة

----------------------------------

اضحك قلب منو اللي رافع منها حاجة ؟! ومشكور على تواجدك في منتدى القصص
ومنور يا نايل ولو انهم النيال هلبة ماشاء الله لكن كلكم منورين

موضوع: رد: بوبكر بو زقية .. 10.01.14 1:40

sooonia كتب:: ليش طلع من قرقرش بس
حلوة حلوة حلوة الحكية

--------------------------
لا هو بعد اللي صار رجع ثاني للمكان اللي كان فيه ، على الأقل ما فيش غادي لا طيط ما ولا عمام غارضة
وعلى العموم منورة وذوقك هو الحلو ( بش ) القصة على قولتك

موضوع: رد: بوبكر بو زقية .. 10.01.14 1:43

almehdi shaban كتب:: تعرف يا سيد رضا فكرتني بشيباني توا متوفي رحمه الله , كل ما يحكي يغلط ويجيب الكلام بالمقلوب .......... ومنها مرة يهدرز في زحمة في مربوعة شوي قال : منين خالي الفاس طبس على مصباح وضربه بيه لين جبهته خشت !!!!!

برا راك مبدع في القص وربي يطيحك في مربوعة كلها شيابين متاع زمان زي هذاك اللي قال : أنا نقول ليه زمان ما عادش يبان هههههههه

مودتي

الله يذكره بالخير هههههههههههه

موضوع: رد: بوبكر بو زقية .. 10.01.14 17:40

أبدعت أستاذ رضاء

لكن ما قلتلناش وين نلقو مليون بوزقية عنده عصا سحرية يحزلنا هالاشتباكات والاعتصامات ويأمن الطرق المارة بورشفانا

موضوع: رد: بوبكر بو زقية .. 11.01.14 18:46

أبواحمد كتب:: أبدعت أستاذ رضاء
لكن ما قلتلناش وين نلقو مليون بوزقية عنده عصا سحرية يحزلنا هالاشتباكات والاعتصامات ويأمن الطرق المارة بورشفانا

في استطاعتنا ان نكون جميعا بوبكر بوزقية، لو أردنا.
منور على المرور

موضوع: رد: بوبكر بو زقية .. 12.01.14 10:24

مش غريبة على استاد رضا هده الحاجات الحلوة
منور ومشكور استادنا