الاخواني والعلماني والطبيعي!!

  - انت مش عضو في المؤتمر الوطني ؟ وفاهم السياسة !!
- تقدر تقول ..
- شن حكاية الكتل نسمع بيها ومانيش عارفها ؟
- وانت شن دخلك فيها هادي سريبها طويل تبي نهار بروحها .
- باهي ياسيدي .. بلاش من الكتل .. نسمع في الناس يقولوا اخواني وعلماني .. حيّرونا .. معادش عرفنا ارواحنا !. توا زعمك أني شني ؟ علماني .. ولا ..اخواني ؟
- واني وين ندري عليك هادي حاجة تخصك.
- باهي فهمني بالك اني واحد منهم ومانندريش على روحي ؟
- لا لا انت ماكش لا اخواني متعصب ولاعلماني رايق ..انت مواطن طبيعي .
- طبيعي ..!! .. امالا أني مش بعيد اخواني ..
- وكيف عرفت روحك اخواني يا فالح؟
- نحس في روحي مانيش طبيعي.. خلوقي في شيشة واعصابي متوتّرة..
- خلاص انت تعرف روحك كانك تحس في خلوقك ضايقات وماكش طبيعي.. هادي هي الاعراض .
- ياساتر استر .. وانت شني تحس في روحك ؟
- لا . لا .. أني رايق ومنشرح وطبييييعي
- باهي وهادي اعراض شنو ياعضو المؤتمر؟
- هادي اعراض واحد علماني طبعا ..هههه
- لا وانت الصادق .. هادي اعراض واحد يصك في اطناشن ألف دينار كل شهر.

خير القول  هو اللهم ثبتنا على كتابك واتباع سنة نبيك * عليه الصلاة والسلام *
فلو تخلطك الحابل بالنابل * الاخواني بالعلماني *
طبعا يصبح العقل طبيعي في غير طبيعي وينتج بعد ذالك * الله اعلم *
شكرا اخي رضا
والحمد لله على عودة المنتدى الغالي الى الواجهة

ليبيا مافلقها الا المؤدلجين وذوي الاجندات الخارجيه سواءا اخوان او غلمان قصدي بنو علمان..