اكتب عالورقة يا القلم !!!!!!!!!!!

موضوع: اكتب عالورقة يا القلم !!!!!!!!!!! 04.01.14 22:59

كلمات كتبتها إبان قيام ثورة 17 فبراير عندما تحركت جموع الشعب في كافة أنحاء ليبيا لإسقاط نظام المقبور وعبّرت عن وطنيتها وأبهرت العالم بتضحياتها دون ثمن !!!!!!!!!!!

بالطبع أصل العنوان أغنية لأسماء بن سليم المعروفة , ونسجت على منوالها كلماتي , علّها تعجب القاريء !!!!!

اكتب عالورقة يالقلم ... وقول لهم ... الثائر عالنصر مصمم

اكتب بنغازي الحرة ... اللي ثارت عالظلم وشره ... والطاغي تعرّى ...وسقاته من كاسه المُرة ... ومن طبرق لعند اجخرّة ... اليد على اليد تسلّم

اكتب عالورقة يالقلم

اكتب عباره ... للشعب الليبي واحراره ... من الزاوية لعند زواره ... وقول لهم انسوا السمسارة ... اللي باعوا الوطن وثواره ... ودكوا حتى مساجدهم

اكتب عالورقة يالقلم

اكتب مصراته ... وقول لهم هي المغاته ...اللي الدم الفاسد نحّاته ... والمجد احياته ... والراس الليبي رفعاته ... والدرس اعطاته ... مكتوبة حروفه بالدم

اكتب عالورقة يالقلم

اكتب تاجوره ... وعروس البحر المشهوره ... ووين هبوا صقوره ... وقادوها الثوره ... جاهم بكلابه المسعوره تنهشهم

اكتب عالورقة يالقلم

اكتب نالوت ... وقول لهم عالمبدا تموت ... ومن وازن ليفرن خوت ... وقالتها الزنتان بصوت ... ايامك تمت يا طاغوت ... خلاص افهم

اكتب عالورقة يا لقلم

اكتب غريان ... وقول لهم راهم فرسان ... وما هم خيان ... لكن سحبان ... محاصرها من كل مكان ... وراس الثعبان ... البلد الأم زرعها سم

اكتب عالورقة يالقلم

اكتب ورفله ... وقول لهم ما تعرف دله ... والتافه لازم توصله ... حمزة واللي كيفه عله ... تنظفهم من الكذب وقلة الحشم

اكتب عالورقة يالقلم

اكتب ترهونة ... وقول لهم للجار حنونة ... والوطن تصونه ... وما تعرف خونة ... لكن مسجونة في وسط كتيبة ملعونة ... ما ترحم وآمرها اكبر مجرم

اكتب عالورقة يالقلم

اكتب فزان ... وقول لهم هي البركان ... ومن سبها حتى ودان ... راهم شجعان ... ولهم في التاريخ مكان ... ويشهد عنهم ماضيهم

اكتب عالورقة يالقلم

اكتب ماضينا ... وقول لهم يا ما قاسينا ... وعالشوك مشينا ... وليبيا الحزينة في عيون الزينة ... ارسمها ارسم وخلي البسمة تحت الدمعة تعم

اكتب عالورقة يالقلم

اكتب حاضرنا ... وقول لهم رانا تحررنا ... وعالماضي ثرنا ... واليوم كسرنا ... الصنم اللي كان محاصرنا ... وتحطم

اكتب عالورقة يالقلم

بقلمي

الله الله على هذا الشعر ابدعت زمان قلو انت شاعر المنتدى الباين مازلت شاعرنا بدون منازع
مودتي
هادي خنبتها منك معلهش
بااااي تسلم ياشاعر

سباقة سونيا ديما بالخير طبعا
شعر جميل
لكن هناك البعض من اللي دكرتهم ممكن يكونو تغيرت طريقهم وفسدو شوية وخصوصا بعد الاحداث الاخيرة انت الشاعر تقدر تضرب هالناس وامتالم اللي انحرفو على مسار 17 فبراير بقصيدة تجيب فيها اجلهم لانهم يستاهلو الصراحة

موفق يا شاعرنا

انا في المنتدى الاول ( غريانية وافتخر ) لو تذكرت يا شاعر المنتدى

sooonia كتب:: الله الله على هذا الشعر ابدعت زمان قلو انت شاعر المنتدى الباين مازلت شاعرنا بدون منازع
مودتي
هادي خنبتها منك معلهش
بااااي تسلم ياشاعر

أهو في غيبة الشعراء نتريسوا فيها ههههههههههه لين تلقوا شاعر مدندن بعدها محسوبك يضم قشيشه ويبطل يتعلط على الشعر .......... مش يقولوا زمان في المثل القديم : خوذي عسيكري لين تلقي راجل هههههههههههه
مودتي .......... واخنبي على حسابك عاطينها للشرش والرصيد كبير ههههههههههه الجماعة تخنب في دولة لين فلست يا بال كلمة باهية وعجباتك !!!

بنت غريان كتب:: سباقة سونيا ديما بالخير طبعا
شعر جميل
لكن هناك البعض من اللي دكرتهم ممكن يكونو تغيرت طريقهم وفسدو شوية وخصوصا بعد الاحداث الاخيرة انت الشاعر تقدر تضرب هالناس وامتالم اللي انحرفو على مسار 17 فبراير بقصيدة تجيب فيها اجلهم لانهم يستاهلو الصراحة

سيدتي بنت غريان : قالوا الشيابين زمان : واحد يقول يا بو ستار والآخر يقول يا بو عبعاب ههههههههههههه
أحنا بنلموا الشمل ونرقعوا البلاد مش بنمزقوا المرقع ههههههههه توا أختي كيف سكرت كانت تتصل وتقولي اجري للبنزينه طريق سبيعة سكرت توا وخشت بعضها ويمكن صار فيها القتل من ورشفانة !!!!!!!!!!!
أنا كتبتها لما كانت الثوار تموت من أجل الحرية في ليبيا كلها مش توا تموت من أجل البنزينة والفلوس والسرقة والحشيش وعصابات قطاع الطرق ......... وهكي كلامي توا ما عاد ينفع مع هالأشكال نهائيا , فقط الردع بقوة السلاح لأن ما يفل الحديد الا الحديد وتطهير البلاد من هالاشكال أصبح واجب وطني وضرورة حتمية لبناء ليبيا . عيشي الخاطرة في وقتها يا غالية مش توا .

موفق يا شاعرنا
انا في المنتدى الاول ( غريانية وافتخر ) لو تذكرت يا شاعر المنتدى

باهي افتخري يا غريانية ما دام غريان ما زالت بخير مقارنة بغيرها لكن لو طفح الكيل اكتبي فزانية وعبده ههههههههههههه
مودتي