البيلقا يدّهور ودوته زايده
يخش للعيادة
الدكتور - شن يوجع فيك
البيلقا - عندي صداع في راسي
على أساس الصداع يجي حتى في الرجلين وإلا الدكتور ما يعرقش مكان وين يجي الصداع ، ماهو يقول عندي صداع وتم ، لكن أهو دوّة زايدة وخلاص
يتلاقى مع صاحبه الكوش
الكوش - وين ماشي يا بيلقا
البيلقا - ماشي بنشري دواء من الصيدلية
على أساس حتى الجزار يبيع في الاكتيفيد والبانادول يا شينك حالة، ماهو يقول ماشي بنشري دواء والباقي معروف، والا زعمك خايف صاحبه يسأله منين بتشري الدواء، بعدين يبدا صاحبه أحرف منه .
يولي البيلقا للدكتور
الدكتور - خيرك وليت شن صارلك
البيلقا - الدواء اللي اعطيتهولي دارلي مغص في بطني
على أساس المغص يجي حتى في الكندرة ، ماهو معروف المغص يجي في البطن لكن أهو دوّة زايدة وخلاص
يدّهم الدكان يبي ياخد شكلاطة للصغار
البايع - تفضل شن تبي
البيلقا نبي سبعة طروف شكلاطة
البايع يعد سبعة طروف ويحطهم في البورزا
البيلقا مداير ايده على لحيته ويشبح في الصقف ويكلم في روحة
- لكن اشرف وعلي مشو لخوالهم
البايع داير روحه ذكي نحّى طرفين شكلاطة من البورزا
البيلقا مازال يشبح في السقف ويهدرز في روحه
- لكن بالتاكيد صغار اختي ايمن وعدنان وسامي و... و...
البايع ..ليه ليه يزيد في الشكلاطة وينقص ويعبي في هاديك البورزا ويفرغ ... صارتله خديمة كان هنّى روحة
لا .. وفي الاخير قاله انقولك: اعطيني طرف شكلاطة ليا اني ، وتوا الصغار يجوا يشروا برواحهم
يعني لازم تشغل معاك الناس كلها يا بيلقا ، ماهو ادير حساباتك بروحك ، وتفك روحك من التفكير بصوت مرتفع.
البيلقا طلع من الدكان كلي الشكلاطة شورها صلاحية منتهية صابه اسهال
رجع للدكتور
طبعا الدكتور بيسأل .. والبلقا متع الدوّة الزايدة يبي يرد
والباقي تعرفوه ..........................
من طرف احمد صالح 22.07.20 13:29