ألو ....ألوووو .. أيوه من معانا ؟
ألووو ... الو.....
أيوه نسمع فيك يامتصل .. من معانا
اني نبي نتكلم على المليشيات ..
أيوه ياخوي الصوت مش واضح ..
ونننننننننننننننننننننن
نأسف .. انقطع الاتصال .. نعتذر للاخ ..اللي اتصل ونقولوله حاول مرة ثانية
تررررررررررررررررررن
السلام عليكم من معانا ؟
معاكم الاكرش من العاصمة ..
أيوه سيد الاكرش انت على الهواء تفضل
بالنسبة لمشكلة المليشيات هادوا المفروضـــ............
ونننننننننننننننننن
نأسف مرة ثانية انقطع الاتصال ..والباين معانا اتصال آخر .
الو من معانا
معاكم رنده ...
تفضلي يارنده
يزيد فضلك ياسلومة إنت والمذيعة اللي معاك حنونة وتسلموا يا رب
يبارك فيك يارندة ههههه ...
وفيكم بارك الله ، أني معجبة جدا بالبرنامج
تسلمي يارنده ..ههههه
الصراحة انتو منورين ومتألقين ديمة ، وخصوصا انت يا استاذ سالم
شكرا شكرا هههههه
لا والله الا جديات ..مش تقول نفاق ولا حاجة ثانية .. برنامجكم فعلا برنامج هادف .
شكرا يا رنوده انت اللي منورة ههههه
اني قبل مانقول رأيي نحب نشكر زميلتك حنونة هلبة هلبة ..
اهي تسمع فيك وبترد عليك
كيف حالك يا رنودة وكيف حال الاسرة .. أه .. شن مدايرة في رمضان ؟
الحمد في خيار الخير، المبطن والضولمة والكفتة وطاجين الجبن كل ليلة
ماشاء الله .. ماشاء الله ... هكي حسك جوعتينا يا رنوده ..
تفضلوا ما يغلاش عليكم ..
يزيد فضلك يا رنودة وتسلمي يارب
العزومة هادي شاملتني حتى أني ولا غير حنان هههههه
اتفضل انت الاول كيف عاد ..
وتوا نرجعوا لموضوعنا يا أخت رندة ..
قبل ما نرجعوا للموضوع أني نحب نشكر مخرج البرنامج الاستاذ اشرف الصراحة اخراجه للبرنامج يفوق الوصف ..
طبعا طبعا ..الاستاذ اشرف يستاهل الشكر وديمه نتعّبوا فيه ، حتى حني نشكروه بالنيابة عن كل المستمعين اللي يتابعوا في برنامجنا.. ألوووو أنت قاعده معانا على الخط ؟
أيوه ايوه .. وين بنمشي قاعده معاكم ..
ايوه يا أخت رندة نرجعوا للموضوع ..هو شن موضوعنا يا حنان ؟
* توشوشله حنان في ودنه بغضب : اسال رنودتك
أيوه ايوه ..عنوان الحلقة ( مشاكل يومية تبي حل ).. ايوه سيدة رندة شن المشاكل اللي تريها موجودة في مجتمعنا وتبي حل ؟
كيف عاد ؟ تو هدا كلام ..احني ما وجهناش الشكر لمعدّ البرناج الاستاذ أكرم .. نبي نوجهله تحية كبيرة كبيرة هلبة هلبة على هالاعداد الجميل للبرنامج ..
ههههه عندك حق طبعا ما ننسوش الاستاذ أكرم الصراحة تعب معانا هلبة في اعداد البرنامج ههههه ..
* تتدخل حنان بنوع من العصبية المبطنة وبدافع الغيرة على خطيبها الاستاذ سالم .
انتو نسيتوا تشكروا مهندسين الصوت ومهندس الاضاءة ومدير الاذاعة والبدالة وشركة لبيانا والمدار وجماعة الكهرباء اللي ما هربوش الضي على البرنامج وسواق التاكسي اللي جابني من الحوش والحااا ........
تررررررررررررررن
الباين الخط انقطع ...
لا لا يا استاذ سالم هذا موبايلي الثاني يرن ، صاحبتي نسرين ديمة تتصل بيا في هالوقت ..
سلمينا عليها يا رندة ههه وبلغيها تحياتنا ههه وتحيات اسرة البرنامج
يوصل يا استاذ سلومة تسلم .
نذكّر الاخوة المستمعين بعنوان حلقتنا اليوم اللي هو ( مشاكل يومية تبي حل ).. وناخذ اتصال آخر .. نقول ألو
أيوه يا استاذ نسمع فيك
من معانا
العفووووو .. الصحاب ولوا معارف ؟ أني رندة قاعدة معاكم عالخط !!
نحساب قلتي جاتك مكالمة من نسرين ..
إيه إيه رديت عليها قلتلها اني عندي شغل مش فاضية توا ..
باهي شن رايك نرجعوا لموضوعنا ..
نرجعوا علاش لا ..هو شن موضوع الحلقة اليوم يا استاذ ؟
كيف يا رندة نسيتي .. قلنا : مشكلة اليوم والــ .. .. يومين .. يوميات ونيـ .. قصدي مشاكل يومية تبي حل .
أيوه .. اني يااستاذ سالم مشكلتي عويصة وما لقيتلهاش حل
الحمد لله وأخيرا لقينا مشكلة .. وشن هي مشكلتك يا سيدة رندة ؟
مشكلتي مع لجوجتي ..
خيره لجوجتك شن حكايته ؟
من ثلاثة شهور اللي جاه جاه مكر مرة وحدة ومعادش خاطره في الخدمة كان اشتغل يوم يركح عشرة . والصراحة مسببلي مشكلة ..
باهي ما حاولتيش تعرفي منه السبب
ما عرفتش خيره !! خوه التوم الحق الحق مريحني .. يخدم ما شاء الله عليه
باهي بالك عنده مشكلة مع جماعته ولا مع اصدقاءه .
لا لا جماعته يخدموا طول النهار زي الفرح والسعد ماشاء الله عليهم ..
باهي اعرضيه على طبيب اختصاصي
عرضته .. قالولي : عنده مشكلة في ذاكرته
باهي .. اعطوه علاج ؟
قالو يبي طرف من الصين ..
كيييف ؟؟؟ انت علاش تحكي يا اخت رندة ..؟
العفو يا استاذ سالم !! نحكي عالمكيف ال جي لجوجتي
ونننننننننننننننن
اخوتنا المستمعين انشاء الله تكونوا استفدتوا من حلقة اليوم ، وقت البرنامج شارف على الانتهاء، وكلمة اخيرة مع زميلتي حنان ...
كيف ما قاللكم زميلي سالم وقت البرنامج انتهى ، الى اللقاء غدا في نفس الموعد ونقوللكم صح شريبتكم وتصبحو على خير
بقلمي : رضا صميده
من طرف احمد صالح 22.07.20 13:29
